وباحلم يا مصر

مش عارف لما بابا الشاعر حمدى عيد كتب الكلام دا كان تقريبا فى الثمانينات وأنا من مواليد سنة 88 يعنى تقريبا من عمرى ولسه بنحلم إنه مصر تبقى كدا وقضى عمره فى حلمه وكبرت أنا وأخويا وبدأت أنا من 2005 العمل بالسياسة برضه عشان أنا بحلم إنه مصر تبقى كدا وأخويا حصلنى وقامت ثورة وسيطر تيارات لا يمكن إنها تخلى مصر كدا 

السؤال بقى هل هييجى اليوم إللى تبقى فيه مصر زى ما حلم بيها بابا مش عارف بس أشك 

وأتمنى إنه ربنا يخيب شكى 

الحلم الأول 

وبحلم يا مصر

أشوفك أميرة

تزينك ضفيرة

وقالعة الحجاب

وابنك وبنتك

على دكة واحدة

عنيهم حتاكل

سطور الكتاب

فى داخل عقولهم

تنبت ترعرع

علوم الحضارة

وشهد الأداب

تدومى عفية

تعيشى صبية

سنينك تطول

ولسه شباب

مادمتى تكونى

عيونك عيونى

اشوفك واجيلك

وافتح لجيلك

على العصر باب

الحلم الثانى 

وبحلم يا مصر

بطهطا بتجرى

وتلحق باريس

وصوت الحقيقة

تدفيه فى صدرك

وترمى فى نيلك

كلام الخسيس

ودايما ولادك

أمانه فى حضنك

وما تبيعى أبنك

فى يوم بالرخيص

حارتنا تنور

ويكتر ضياها

بصيص فوق بصيص

وتبقى الجرايد

شموس الحقيقة

ويبدأ دفاها

وومضة ضياها

من الكراريس

الحلم الثالث 

وبحلم يا مصر

وبحلم اترجم

جميع ما يفيدك

وأرجع وأترجم

كلامى حقيقة

وتتمد إيدى

تخضر فى إيدك

وصوتى يغنى

أمانى عبيدك

ويفضل جمود

العقول الأسيرة

عدوك طريدك

على صهد نار

الأمانى السجينة

نحضر لعيدك

ورغم السواد

المعشش فى طينك

يصرخ وليدك

الحلم الرابع 

وباحلم يا مصر

أشوفك صفوف

فى أنتظار الأشارة

تخطى التخلف

وتبقى منارة

ومهره أنطلقتى

فى طريق الحضارة

تصفى حسابك

مع اللى خانوكى

كما يوم سقوكى

كاسات المرارة

والقاكى عايزة

تعيشى أميرة

والقاكى رافضة

تكونى إمارة

عذابهم يكحل

عيونك طهارة

ورغم المظالم

لسانك بينطق

ورغم المشانق

فى قلبك جسارة

الحلم الخامس 

وباحلم يا مصر

أزيح الظلام

اللى جواكى غارس

على ضهر مهره

وأطير زى فارس

مع القطن أزرع

متاحف معامل

مع القمح أزرع

مصانع مدارس

وأجيب التجارب

وأطبق وأمارس

وفوق المزارع

وجوا المصانع

بيشقالك أبنك

لكن رغم شغله

مثقف ودارس

وراية العدالة

تضلل عليكى

ومن قلب طينك

لها ألف حارس

الحلم السادس 

وباحلم يا مصر

برغم الشوك على جبينك

يفتح النوار

يحوشوا الميه عن طينك

وبرضه تطلع الأزهار

ويسقوا الصبر فى عروقك

إيديكى تدبل الصبار

وعز المحنه نلقاكى

الأمل والدار

وعز الضلمه تتخلقى

أرق نهار

الحلم السابع

وبحلم يا مصر

بالحب زى الهوى

بيعطر أنفاسك

كل القلوب تعشقك

وتدق أجراسك

والكلمة تبقى عفيفة

فوق لسان ناسك

لو يظلموكى تبقى أحمى

من سنون فاسك

الحلم الثامن

وبحلم يا مصر

مايجيكى يوم يحكمك

حاكم غريب عنك

ولا يوم يقول كلمتك

غير الجاى منك

ولا حد ينسى تاريخك

ويصغروا سنك

والفن لو كان خليع

ما يبقى من فنك

الحلم التاسع

وبحلم يا مصر

تحكى ماضيكى بأمانة

تكشفى مين اللى باعك

فى دهاليز الخيانة

ومين اللى عشتى جوه نن عنيه أمانة

ومين اللى حس الكلمة فيكى مسئولية

ومين اللى قال الكلمة مرعوشة وجبانه

ومين اللى عارفك طين وعلقم

ومين اللى حافظك بار وحانه

ومين الأيد المرتاحة

ومين الأيد العرقانه

ومين بره حدودك بيتفسح

ومين جوه حدودك هجانه

الحلم العاشر

وبحلم يا مصر

كما أسمك على لسانى

ألاقيكى بتحكى للبشر أسمى وأوصافى

تقوليلهم دا أنا 

ابنى الحبيب

فارس ومتعافى

لكن كلام الحب فى قلبه

عمره ما كان خافى

وألاقانى فوق صدرك بنام

دمعى الحزين دافى

تفردى حضنك أمان

تضمينى ولا تخافى

تحطينى على جراحك

حتلقينى الدوا الشافى

وف عيونك تشيلينى

وأنا أشيلك على أكتافى

أوعى رغم الخوف ترضى تسيبينى

ف الغربة وف ليل المنافى

الحلم الحادى عشر

وبحلم يا مصر

رغم الآلام أعشقك

عشق الولايف

وأمشى فى ضلام سكتك

عمرى ما أكون خايف

والقى أبتسامة عريضة

راقدة فى حضن الشفايف

لو يسرقوا النور من عيونى

بعنيكى أعيش شايف

الحلم الثانى عشر

وبحلم يا مصر

بحلمبك كما ساعة ولدتينى

حنونة رغم الآلم مارضيتى ترمينى

وف عز ليل الشتا حضنك يدفينى

وإن كنت أرقد عليل

كفك يداوينى

وإن كنت أبعد بعيد

صوتك ينادينى

وإن كنت يوم أغضبك

برضه تسامحينى

أن تهت يوم فى الطريق

أوعى تعاتبينى

سيبينى أبكى على صدرك

وبحب دلينى

الحلم الثالث عشر

وبحلم يا مصر

بعد ما عشتك سنين صايم

ع الأمان أفطر

من تانى أشوف قلب الولاد فرحان

والصبايا على شطوط الترع

ماشية بتتمختر

والعيون العاشقين

لا عز حراسك بتسهر

والمدارس والمصانع والمعامل

تبقى أكبر

والأراضى البور وفوقها الزرع الأخضر

نفسى أشوفك يا بلدنا

وأنتى قد الأسم وأكبر

أنا مش رجعى ولكنى تقدمى جدا

إنسان أعيش بين الناس لا أسعى إلا لما أرى أنه فى مصلحتهم بشكل حقيقى دائما فكرى نابع منهم ومن مشاكلهم ببص دايما على أصغر واحد فيهم لأنى مؤمن بأنه إذا أصبحت نظرتى للأصغر فى تحليلى وتقييمى وأبتكار حلول لمشاكله هيعود على اللى فوقه واللى فوقه واللى فوقه 
ببساطه يا أصدقائى الحاجات اللى دايما بتلمع بتبقى سكه ومغشوشه ودايما مشكلة الحاجات الجميلة أنها بهتانة ومش ملفوفة كويس زى بالظبط فى الإنتخابات عندك قوائم كتير منها اللى بيلمع  ومغشوش ومنها اللى بهتان ومحترم جدا دايما تلاقى هى دى القاعدة 

ما علينا المهم بقى أنه أنا عايش وسط الناس وبتفرج عليهم ومش بشارك إطلاقا فى تغيير رأيهم ليه عشان دايما الناس دى عندها قناعات بأنه لازم يكون فى حد شايل همهم وهو اللى عليه كل حاجة ومقابل دا بيبقى فى سنة هبل وحبة عبط أنه مثلا بيكون نصف إله ومبيتكسرلهوش أى كلمة وبالتالى دايما هما مش بيشيلوا مسئولية قرارتهم فأنا قولت لنفسى أنا مش عايز الناس دى تجرب تانى 60 سنة أبوية خليهم هما اللى يقرروا وياخدوا قرارهم بحرية ويجربوا ويشوفوا ويلمسوا الفرق ويبدأو بعد ما كانوا ولا بيهشوا ولا بينشوا يتكلموا ويتابعوا ويقولوا لأ أو أه واللى طبعا نتيجته أنه محدش هيعرف يضحك عليهم ولا على غيرهم وعينهم هتبقى وسع كداااااااااااااااا 
طيب هو إيه علاقة الرجعية والتقدمية بالموضوع دا ؟ 
سؤال وجيه وجميل جدا والإجابة ببساطة إنه أنا عايز أعمل أثر فى حياة الناس دى لكن مش دلوقتى لأنى ببساطة لسه شاب صغير حاجات كتييييييييييييير أوى معرفهاش وكمان معنديش إمكانيات التفرغ للعمل العام والتأثير فيهم ومش مستعجل لإنه كل الأنبياء نزلت عليهم الرسالة وهما فى الأربعين من عمرهم يعنى سن النضوج وأكيد مش هفضل قاعد حاطط إيدى على خدى لغاية ما ييجى سن النضوج إنما أجهز وأدرس وأبحث وأتعلم وأعرف على قد ما أقدر خبرات من الدنيا عشان لما أجى أدخل التجربة اللى مش مضمونة دى أكون جاهز وعالم وفاهم إيه إللى قدامى وبرضه إيه اللى ورايا 
المهم يا شباب أنا تقدمى أومن بأن العلم هو الوسيلة الوحيدة للتقدم والترقى وأنه مصر دولة عظيمة بشعبها لأنه مصر دى شيئ معنوى قطعة أرض إنما الشعب هو اللى بيصنع حضارة وعظمة هذه القطعة اللى بتتسمى فى الآخر مصر وإنه الشعب دا أتعرض لأبشع جريمة تجريف فى الدنيا يعنى 60 سنة من محاولات التغييب والتسفيه والتغييم على عقله وعلى ثقافته وعلى معارفه لدرجة نقدر نشوفها حاليا فى كل شارع وف كل مصرى ماشى قدامنا وأنه عشان نطلع بالشعب دا لقدام ونرجعه تانى لأصله اللى هو منسهوش لأنه فى دمه بدليل طوابير الإنتخاب الرائعة فعلا اللى شفناها لازم نستخدم وسائل محترمة أولا لينة ثانيا معاه وأنه نبعد عن إللى بسميه "محاربة الجهل بالجهل" بمعنى أنه أنا مثلا بؤمن بأن المرآه مثلى بالظبط لها نفس الحقوق وعليها نفس الواجبات وإنها مش عورة لأنها أمى وأختى وحبيبتى وجارتى خلقنا ربنا زينا زى بعض 
بؤمن بأنه الحجاب دا شيئ فارغ لإنه ببساطة لو ربنا حب إنه يخلق الست بشكل تانى كان خلقها وإنه ربنا لو مكنش عايز يخلقها أصلا مكنش خلقها لكن لما خلقها خلقها على صورتها دى الأصلية منزلتش بحجاب زى بالظبط ما أنا منزلتش بكاب يعنى أنا أحيانا بلبس كاب وأحيانا لأ وهما برضه 
مؤمن بإنه البنت تشتغل زيى لإننا أصلا لو فعلا بقى عندنا إرادة إننا نبنى مجتمع صناعى وزراعى حقيقى هنبقى محتاجين إنه العيل الصغير ينزل من بطن أمه يشتغل وهنبقى محتاجين ناس كتير أوى عشان يكفوا على الشغل طبعا دا غير أنه الولاد فى مصر بيخلصوا يعنى من الآخر كدا بعد كدا هيبقى مطلوب من كل ولد إنه يتجوز أربع بنات عشان ميبقاش فى عنوسة إلا بقى لو هنحلل الزنا دا موضوع تانى أنا عن نفسى مرضاش بيه وضده من دلوقتى اهه 
طيب المجتمع بقى والناس اللى انا عايش فى وسطها عندها رأى تانى ولسه قدامها مراحل كتيييييير أوى على ما يطلع منها اللى يفهم اللى بيتقال دا ينفع بقى أنى أفضل أستخدم معاه نظرية محاربة الجهل بالجهل ولا أخده واحدة واحدة وعلى المهل وبراحة أعلمه الأول وبعد كدا أخليه يشتغل وبعد كدا يسكن ويتزوج ويخلف أولاد يبقى مرتاح وشايف مستقبلهم زاهر وجميل أثقفه وأفهمه وهو لوحده من غير ما حد يطلب منه هيعلم أولاده اللى أتعلمه هيطلع أولاده متعلمين أبدأ أزرع فيهم الخطوة التانية وهى بناء حضارة فيبقى بعد كدا الكل بيطلع على الأفكار الأولانية ثم الثانية فتبقى مصر أتوماتيك واحدة واحدة بتزدهر وبترتقى وبتتقدم 
كدا بقى أبقى أنا رجعى ولا تقدمى 
أرجوكم قولولى رأيكم واللى مش عاجبه كلامى بلاش لو سمحتم يشتمنى بس الأحسن أنه يناقشنى لإنه دايما النقاش بيبنى لكن الشتيمة بتهد وإحنا شبعنا هد وشبعنا شتيمة أشكركم 

أنا مع الانتخابات

أكيد مش محتاج أقولكم إنزلوا إنتخبوا إنما إللى محتاج أقوله وأكد عليه مليون مره إنى ضد مشروع الإخوان والسلفيين إللى هيرجع مصر 1500 سنة ورا وضد مشروع الوفد إللى عايز يرجع الفلول لحياتنا تانى لكن أنا مع قائمة تحالف الثورة مستمرة وقائمة الكتلة المصرية وقائمة الوسط لإنهم شرفاء بجد ونفسهم إنهم يطلعوا بمصر مليون سنة قدام وعشان ميبقاش الكلام فى المطلق وبدون دليل إنتم تقدروا بعقولكم تقرأو برامجهم وتشوفوا هما بيقولوا إيه !

ولا إيه ؟

قائمة تحالف الثورة مستمرة 

البرنامج 

قائمة الكتلة المصرية 

البرنامج 

قائمة الوسط 

البرنامج 

عليكم الإختيار من أجل مستقبل وليس حاضر ومن أجل مستقبل مزدهر وحضارة عظيمة عشان خاطر إننا نلاقى تعليم محترم وشغل وسكن ورعاية صحية وعدالة إجتماعية وحد أدنى وأقصى للأجور ومحاسبة كل الفاسدين وبدون أى تهاون والقصاص من إللى قتلوا المصريين فى 25 يناير و28 يناير وموقعة الجمل والثلاثاء الدامى وماسبيرو ومحمد محمود وقائمة طويلة من الشهداء على مدار 30 سنة فى القطارات وفى العبارة وفى أقسام الشرطة .

صديقى العزيز بالله عليك وانت بتدى صوتك أفتكر حق الشهداء ومحاسبة الفاسدين ومستقبل ولادك والطوابير إللى وقفت فيها أكتر ما أشتغلت 

إفتكر إنك ملكش حقوق عند اللى انت شغال عنده 

إفتكر إنه مرتبك مبيكفيش أى حاجة 

إفتكر إن ولادك محتاجين تعليم ورعاية صحية وسكن وشغل 

إفتكر إننا كلنا محتاجين صوتك ومحتاجينك تكون معانا فى خندق واحد ضد أى حد عايز يحط نفسه مكان الحزب الوطنى المنحل 

ركز وأختار صح